काठमाडौँबाट रामेछाप उडेको जहाजमा प्राविधिक समस्या देखिएपछि काठमाडौँमै फर्किएको छ । सोमबार बिहान काठमाडौँबाट रामेछापको मन्थली उडेको सिता एयरको जहाजको हाइड्रोलिकमा समस्या देखिएपछि काठमाडौँ विमानस्थलमै फर्काएर आकस्मिक अवतरण गराइएको छ ।
विमानस्थलका प्रवक्ता सुवास झाका अनुसार सीताको ९०६ उडान नम्बरको जहाज काठमाडौँबाट रामेछापको मन्थली जाँदै थियो । तर, हाइड्रोलिकमा समस्या देखिएपछि काठमाडौँ विमानस्थलमै फर्काएर आकस्मिक अवतरण गराइएको हो ।
झाका अनुसार हाइड्रोलिकमा समस्या आएपछि जहाज अवतरणमा समस्या हुन्छ । तर, काठमाडौँ नै फर्काएर सुरक्षित अवतरण गराइएपछि धावनमार्गमा रोकिएको जहाजलाई तानेर पार्किङसम्म पुर्याइएको छ ।
उक्त जहाज रामेछाप हुँदै लुक्ला जाने तयारीमा थियो ।